30/12/15

FELIZ ANO NOVO






BRINDAMOS POR UN 2016 DE CELEBRACIÓNS PARA A LINGUA E A LITERATURA GALEGAS!

MANUEL MARÍA EN TEMPO DE NADAL


PANXOLIÑA DOS GALEGOS

¡O Neno Deus é un neniño
que namora soio o velo!
¡Os seus ollos son de luz
e de ouro fino o cabelo!

- ¿Non vedes fiar a Virxe
tan caladiña e tristeira?
- ¿Imos levarlle, pastores,
un año branco e manteiga!

San Xosé é carpinteiro
e xa non serra madeira.
¡Anda a facer unha cruz
dun pauíño de oliveira!

¡Camiñade, galeguiños,
camiñade ata Belén...!
¡Xa naceu o Rei do Ceo
e quen lle cante non ten!

13/12/15

EN MARCHA!

Case todo pronto para, unha vez rematados os exames e as correccións, coller camiño de Outeiro de Rei para inaugurar o que será o Ano de Manuel María en 2016 coa celebración do Día das Letras Galegas.

Velaquí un primeiro encontro virtual coa casa museo de Manuel María onde nos agardan moitas sorpresas para este mércores 16 de decembro.

En marcha!


07/12/15

MEMORIA DE XOSÉ NEIRA VILAS

Hai uns días despediamos o escritor Xosé Neira Vilas, un autor referencial e testemuña da literatura galega da segunda metade do século XX e até a actualidade, pois estaba a piques de presentar estes días o que xa será a súa derradeira publicación, a novela Romaría de historias.

Memorias dun neno labrego (1961) é cualificado como un best seller da literatura galega polo continuo número de edicións e traducións, o que a converteu nunha obra clásica da literatura universal.

Podemos lela en soporte impreso mais tamén dixital e imos comezar por aquí, por este último formato, para nos achegar a Balbino, o personaxe central desta novela que o autor quixo dedicar "A todos os nenos e a todas as nenas que falan galego".






29/11/15

DESCUBRINDO A BRAIS MORÁN

Continuamos coa nosa serie de descubertas no campo da música galega e agora chega a quenda do músico da semana do noso blog: Brais Morán.

Nesta ocasión, foi Ezequiel Corporán (3ºB) o encargado de elaborar a entrevista ao músico destacado neste blog ao longo da semana pasada.

É hora de compartirmos publicamente as súas palabras para coñecelo moito mellor a nivel persoal e musical.




1- Como empezaches na música?
Veño dunha familia de músicos, co cal nacín cun pandeiro nas mans e escoitando guitarras desde moi pequeno. Sempre escoitei moita música variada e o meu oído estivo relacionado co ritmo mentres medraba. Aos 9 anos comecei a tocar a guitarra e comecei a estudar, até que hoxe en día me dedico a compoñer cancións.


2- A que anos empezaches a tocar profesionalmente?
Podería dicir que profesionalmente foi aos 19 anos cando comecei a traballar disto. Aos 13 xa tocaba con xente facendo grupos e participando en espectáculos de teatro.


3- Que instrumentos tocas?
O meu instrumento é a guitarra e, como me gusta cantar, sempre vai unido á voz, que é outro instrumento que hai que coidar moito.
Tamén toco algo o piano, pero simplemente para acompañar alguna canción sinxela.


4- O teu primeiro tema como compositor, cal foi, como o creaches, que te inspirou?
Mmm...qué difícil!!jejejePenso que non o lembro, pero pode que fose unha canción que non volvín tocar. A primeira canción en galego creo que se chamaba Porque ti choras e toqueina algún tempo con Loretta Martin. Aí seguro que me inspiraron os Beatles, Bob Dylan e as praias da Costa da Morte. Xa non me lembro como a creei, pero sería así como descubrín que sabía compoñer e deixeime levar.


5-Ademais de cantar (e tocar algún intrumento) dedícaste a algo máis?
Si. Son profesor de guitarra en escolas e traballo no mundo das artes escénicas: cine,teatro... Estudei a carreira de Historia da arte porque para min todo está na creación.


5- O artista co que máis te identificas, cal é?
Supoño que serán moitos... George Harrison, Mick Jagger, Jay Kay, Chris Cornell... Actualmente o artista galego co que máis me podo identificar é Fran Pérez Narf.


6- Poderíasnos contar algunha anécdota da túa carreira musical?
Cada ano vivo cousas diferentes, pero se teño que dicir unha moi especial foi cando me recibiron os nenos e nenas do CEIP de Arteixo e cantamos xuntos a canción En paz. Regaláronme un álbum con debuxos firmados por cada alumno. Foi increíble e emocionante.


7- Fálanos do teu estilo musical en particular,como chegaches a el?
Non teño estilo musical definido, pero son amante do funk,do soul e do rock.


8- Como definirías o teu novo traballo discográfico que comezas a presentar agora, Cruzando o eclipse?
Cruzando o eclipse é un disco onde teñen cabida todos estes estilos. A base de escoitar moita música saen as cancións e o seu son. Quizais poida dicir que é un repaso de toda a miña vida musical. É un disco con moita forza, moita melodía e moitas ganas de loitar polas cousas que queremos.



9- Con que artista che gustaría compoñer unha canción?
Xa o fixen con Fran Pérez e pódese dicir que foi un soño cumprido. Tiven a sorte de estar acompañado por Susana Seivane nun concerto e espero que co próximo artista co que compoña unha canción haxa a mesma química que houbo con eles.


10- No teu día normal, que fas? 
Traballo dando clase e preparando actividades, ademais de ensaiar e traballar na miña propia música. Gústame saír a pasear e verme coa xente que quero.Teño a boa sorte de poder organizarme para poder facelo todo.


11- Rematamos falando de futuro, como o imaxinas?

Somos dunha tribu que acredita no futuro e todo de nós depende no presente. Con iso defino que temos que loitar por mellorar e ser positivos ante a vida en calquera momento que amamos. O futuro dependerá do que aprendamos día a día.



Moitas Grazas por todo!

Cruzemos o eclipse xuntos!



25 DE NOVEMBRO, VIOLENCIA DE XÉNERO NUNCA MÁIS!




A partir do visionado desta peza tirada do blog Trafegando ronseis, imos traballar, tal e como avanzamos na aula, a expresión escrita a partir de dous modelos de textos.

O alumnado de 4º deberá preparar un texto argumentativo e o de 3º un texto expositivo, tomando como referencia a mensaxe que nos dirixen as imaxes explícitas e implícitas do vídeo.

O prazo de entrega da tarefa é o martes 1 de decembro.

25/11/15

25 N, NUNCA MÁIS VIOLENCIA DE XÉNERO

O alumnado de galego do Instituto Cañada Blanch de Londres deixou testemuña do seu posicionamento explícito en contra da violencia machista.

Comprobémolo e sumémonos á construción dunha sociedade verdadeiramente xusta, respectuosa, equitativa, igualitaria e equilibrada tamén nas relacións entre os xéneros, entre homes e mulleres.

Fala Londres #homesconsaia





03/11/15

O CIENTÍFICO ÁNGEL CARRACEDO E AS LINGUAS

Xa sabemos que iso de ser de letras ou de ciencias en exclusiva non existe.


A competencia lingüística é a base das relacións humanas e, polo tanto, do noso traballo diario, independentemente de cal sexa este, así como das comunicacións múltiples que mantemos con interlocutores e contextos diferentes.

Tamén sabemos que das linguas parece que todo o mundo sabe e entende. 

Mais, imos ler atentamente o que opina neste artigo o científico bergantiñán Ángel Carracedo, a partir da súa riquísima experiencia de contacto con linguas diferentes vinculada á súa profesión.

26/10/15

GONZALO HERMO, PREMIO NACIONAL DE POESÍA NOVA

Hai unhas semanas celebrabamos a concesión do Premio Nacional de Literatura Infantil e Xuvenil á escritora Ledicia Costas pola súa obra  Escarlatina, a cociñeira defunta.

A alegría continúa ao sabermos agora que o poeta de Rianxo, Gonzalo Hermo, acaba de ser recoñecido co Premio Nacional de Poesía Nova polo seu poemario de título ben premonitorio: Celebración.



Imos descubrir un pouco máis este poeta, desde esta entrevista que hoxe publica o xornal La Voz de Galicia.



Nos dous casos prémianse por parte do Ministerio de Cultura español obras en galego, antes de estaren traducidas, polo que o recoñecemento é dobre, á creación literaria e á lingua que a alimenta e constrúe.

Orgullos@s das nosa letras! Orgullos@s da nosa lingua!

20/10/15

DESCUBRINDO A GUADI GALEGO

Nerea, Carmen e Patri, compañeiras de 3º B, comparten connosco esta entrevista realizada á cantante Guadi Galego para nos achegar a quen presidiu nestas dúas semanas o espazo musical deste blog de aula.

Moitas grazas polo voso traballo! 

E moitas grazas a Guadi Galego pola súa atención, por acoller tan cariñosamente estas preguntas e por respondelas tan axiña!



1. A que anos empezaches a cantar? Quen te animou?
Pois realmente creo que canto dende que teño uso de razón, mais profesionalmente comecei relativamente tarde aos 23 anos.
Ninguén me animou,creo que me vin forzada pola situación.Tiña que dicir si ou non a cantar para entrar en Berrogüetto.
2. Estiveches en contacto coa música e o canto xa no teu ambiente familiar?
Si,na miña casa había afeccionados, sobre todo o meu pai, e lembro que miña avoa cantaba moito e ben.

3. Pensabas en dedicarte profesionalmente á música?
Non,nunca pensei en dedicarme profesionalmente a nada…iso ocorreu, sen máis.

4. Desenvolves algunha outra profesión?
Son mestra de primaria,iso faime feliz.

5. Tocas algún instrumento? De ser así, que prefires: cantar ou tocar?
Toco algo o piano, algo a gaita e un pouco a percusión. Mnnn... creo que cada cousa ten a súa función.Tocar permíteme compoñer de xeito máis divertido.

6. Participaches en varias formacións musicais e agora gravas en solitario: que opción che satisfai máis?
Ambas, creo que tocar nunha banda permíteche ver moito máis mundo que o teu propio; por outra banda, ser solista é correr coa responsabilidade, tamén é un reto.

7. Onde encontras a inspiración para as túas letras?
Heheheh….na vida vivida e na non vivida, nos soños que fican nas gaiolas e nos que arrincaron os feches!!!

8. Toda a túa música se expresa en galego; pensaches algunha vez en mudar o idioma para ser máis coñecida como artista?
Nunca pensei en mudar a lingua para ser máis coñecida, mais pensei en cantar noutra lingua porque as circunstancias o requerían…sen mais.

9. Que se sente cantando a túa música, na túa lingua, polo mundo e ser recoñecida con premios?
É algo que non se paga con cartos. O mellor do mundo é ver como a xente canta as túas cancións…na túa grande pequena lingua ,purrando e purrando.

10. Estás preparando algún novo proxecto despois do último que coñecemos, Lúas de outubro e agosto?
Estou compoñendo mais non sei para que…deixándome levar!!!Nunca se sabe.

11/10/15

JAVIER GÓMEZ NOYA E A LINGUA


Descubrimos esta semana un gran deportista, pentacampión do mundo de triatlón, grazas á completa entrevista que nos ofreceu o semanario Sermos Galiza.

Revisamos na entrevista cuestións morfolóxicas referentes á adxectivación e á derivación por prefixación e agora toca coñecer a vinculación, reflexión e opinión de Javier Gómez Noya a respecto da cuestión lingüística recollida no programa Eu falo.


E rematamos este percorrido pola biografía persoal e deportiva do noso deportista máis internacional, pero sempre recoñecido na casa, coa lectura do pregón das Festas da Peregrina de Pontevedra deste 2015.

Parabéns!!!

Grazas por levarnos contigo polo mundo!!!









A NOITE QUE VAN MORRISON CANTOU EN CARBALLO

Con este título do relato de Ramón Vilar Landeira que abre o volume colectivo Contos de taberna iniciamos unha lectura que ha ser ben diferente a todas as precedentes.

E para amplificarmos a escrita deste primeiro relato, imos descubrir por que comeza cunha cita do tema "Sweet Thing" de Van Morrison.

 

Quen nos pode explicar o vínculo entre este tema musical, a praia da Arnela, Carballo e o Ánfora, a viñoteca próxima ao Pazo da Cultura?




29/09/15

POEMA PARA DESPEDIR SETEMBRO




Imos despedir este mes de setembro propio do reencontro nas aulas cun poema de Marta Dacosta do seu libro As amantes de Hamlet.

Que imaxes, sensacións ou pensamentos vos provoca a súa lectura?



Cando o instinto manda
e unha forza igual ao amor arrástranos
non importa que os anos marcaran as miradas
ou que as mans xa perderan o xeito adolescente.
O día interminábel instálase na mente
e as linguas que marmuran pexan os nosos pasos,
mais en chegando a noite
as coxas reconstrúen os anos que se foron
desandan os camiños e volven a outro tempo.

A lúa de setembro devólvenos os corpos
cos que nos desexamos hai xa tantas vendimas

23/09/15

OUTONO MUSICAL

Imos voltar saudar o outono da man do concerto centrado neste tempo dentro da obra As Catro Estacións de Vivaldi e con ela actualizar algunhas cuestións morfosintácticas e léxicas.



1. Inspirándote na escoita e na visualización da obra, enumera cinco palabras simples que se correspondan con estas categorías de palabras: substantivos, adxectivos, adverbios e verbos.

2. Escolle cinco palabras das anteriores e procura novas palabras derivadas.

3. Constrúe dous exemplos de frases nominais, preposicionais, adxectivas e adverbiais.

4. Agrupa todo o vocabulario por campos semánticos.

5. Redacta unha oración transitiva, unha intransitiva e outra impersoal.

Agardamos as vosas respostas completas e correctas até o venres 25 ás 24:00.

BENVIDO OUTONO



Se en setembro empeza a chover, outono seguro é

A horta en outono mantén o seu dono
  
Outono chuvioso ano copioso

Outono quente trae o demo no ventre

Moita flor na primavera bon outono nos espera

San Migueliño das uvas maduras, moito me tardan e pouco me duran

Polo San Martiño vai ver o teu soutiño



Oficialmente xa temos connosco o outono e canda el vén o ciclo da vida da terra a dar os seus froitos de temporada, tal e como testemuñan os refráns populares.

Algúns deses froitos están agochados nas adiviñas. Imos ver quen dá cun froito ben común deste tempo agochado nesta...

Alto vivo,
mírame a xente
e se me río
quedo sen dente

Esta entrada ficaría incompleta sen a vosa colaboración, así que imos aló!

Quen nos agasalla refráns e adiviñas relativas ao tempo de outono?

O tempo comeza xa! 

 


18/09/15

FESTA DA PATACA



Esta fin de semana non vai haber outro falar que non sexa a XXV Festa da Pataca de Coristanco que, como todo grande evento, ten un pregoeiro de excepción que de certo non vos ha ser alleo ao alumnado que procede do colexio da Agualada: o profesor Evaristo Domínguez, gran coñecedor e incansábel investigador da comarca de Bergantiños.




Na Lingua de Alcaián agardamos pola vosa información de primeira man sobre a actualidade das súas palabras e da estupenda fin de semana festeira que agarda por estes lares.



17/09/15

QUE FALA A WIKIPEDIA?


Algunha vez detivéstesvos a pasear pola columna da esquerda dunha páxina da wikipedia? 

Cantas linguas existen no mundo real e tamén no virtual, non si? 

Cantas persoas temos acceso á información máis próxima a nós ou lonxana no noso idioma propio!

Hoxe soubemos que o galego ocupa en presenza na wikipedia o posto 45 con 125.000 artigos.

Imos saber máis do alcance desta nova tan importante que nos ofrece o xornal dixital Praza.

15/09/15

COMEZAMOS CON EFEMÉREDE LITERARIA



Tal día coma hoxe, 15 de setembro, mais de 1851, nacía o poeta Manuel Curros Enríquez en Celanova.

Que mellor momento para retomar a nosa capacidade investigadora e procurar respostas a estas preguntas?

Olliño! Que o alumnado de 4º ESO levades moita vantaxe!

CUESTIONARIO:

1. A que provincia pertence Celanova?
2. En que cidade comezou a súa carreira xornalística?
3. En que cidade galega gañou o primeiro certame poético?
4. Con que textos?
5. Que poemario publicou en 1880?
6. Por que poemas foi xulgado e absolto? Cal era a razón?
7. A que etapa da literatura galega pertence?
8. Foi Curros Enríquez emigrante?
9. Por que aparece o seu nome vinculado á fundación da Real Academia Galega?
10. Onde faleceu? Onde está soterrado?
11. Identifica lugares, espazos e edificios públicos galegos que leven o nome do poeta.
12. Por que viviu unha triste realidade recentemente unha virxe de cristal que dá nome a un poema seu?

Para acompañar o traballo, deixémonos levar pola musicalidade da voz de Uxía para este poema tan coñecido de Manuel Curros Enríquez.

Sorte coa investigación! Agardamos respostas aquí no blog até o 23 de setembro.


14/09/15

BENVIDA AO NOVO CURSO ESCOLAR 2015-2016




  "Cinco minutos bastan para soñar toda unha vida, así de relativo é o tempo"




Que tal se intentamos soñar conxuntamente todo un curso?

23/06/15

MÚSICA PARA A DESPEDIDA

Non hai mellor xeito de nos despedir deste curso que xa remata, nesta véspera do día de San Xoan, dono da noite máis curta e do día máis longo do ano, que con esta peza musical interpretada pola banda de Roi Casal, titulada precisamente Noite de San Xoan.

Volvede en setembro ben vacacionad@s!!!

Bos ventos para a xente magnífica de 4º que xa non virá máis que de cando en vez de visita. Non deixedes nunca de nos contardes como seguides o voso rumbo!!!

Bo verán!!!

25/05/15

A VOLTA A CURROS EN NOVE ETAPAS




Imos concluíndo o estudo do Rexurdimento galego coa lectura da obra poética de Manuel Curros Enríquez. Mais é preciso percorrer, canda os seus versos, un tempo de luz para a literatura, a lingua e a conciencia galega.

E xa sabemos que para aprender máis e mellor, non hai nada como un bo traballo de investigación cooperativo, man a man con cada membro dun bo equipo.

Esta é a metodoloxía que presegue a unidade didáctica A volta a Curros en nove etapas que agora iniciamos.

Mais, antes de comezarmos, imos facer unha proba inicial de coñecementos desde aquí.

Preparadas? Aló imos!

13/05/15

PREPARADAS PARA UN NOVO CORRELINGUA

Mañá é o día da celebración anual do Correlingua, así que nos vemos na Coruña para celebrarmos que facemos parte do lema deste ano: 

Galego, a nosa creación común.

Percorreremos con ansia e moita festa as rúas da cidade para chegarmos canto antes á Torre de Hércules, escoitar o orixinal manifesto WhatsAppeiro gañador do concurso deste ano, autoría do alumnado de 4º ESO do CPI de Pontecesures, e bailar ao vivo a peza do grupo gañador do certame Cantalingua, Bocinazo, co seu tema "Oda ao Esterco".

E para irmos collendo ritmo, probamos co vídeo gañador do outro concurso que organiza o Correlingua, intitulado "O galego é de todos", da autoría de mozas e mozos do CPR Sagrada Familia de Aldán (Cangas do Morrazo).


07/05/15

PRÓXIMA CITA VIGUESA

O martes 12 de maio desprazaremos as nosas aulas de lingua e literatura á viguesa Casa Galega da Cultura para coñecer de primeira man os fondos documentais do legado de Fermín Penzol.

Na sede da Fundación Penzol descubriremos aqueles datos relevantes dunha figura clave das letras galegas da segunda metade do século XX: Xosé Mª Álvarez Blázquez, grazas a unha exposición recentemente inaugurada co gallo do centenario do seu nacemento e a cuxa inauguración imos achegarnos desde aquí, abrindo a primeira porta do noso saúdo.


PERIFRASEANDO

Imos chegando á fin do repaso morfolóxico verbal das últimas semanas e tócalle a quenda ás perífrases verbais. 

Ímonos remangar para debruzarnos neste enlace e revisar algunhas nocións teóricas que nos axuden a recoñecer unha perífrase verbal e a diferenciar o seu valor. Finalmente, como non hai mellor teoría que unha boa práctica... adiante cos exercicios propostos na parte final!

Para tomalo con humor, imos comezar recoñecendo dúas perífrases verbais nesta imaxe do humorista Luís Davila, "O Bichero".


28/02/15

GALEGO EN ESTREMADURA?


Rematando xa as unidades correspondentes á dialectoloxía en 4º ESO, descubrimos hoxe unha nova no xornal dixital Sermos Galiza que dá conta desa fala propia do Val de Xálima que tanto se aproxima aínda ao noso galego.

Imos averiguar nesta entrevista a Julián Carretero algo máis da historia deste Valego, das súas orixes e o estado de vitalidade desta fala na cidadanía.

27/02/15

MÚSICA E POESÍA... FELIZ DÍA DE ROSALÍA!



Despois de tempo de traballo interno e silente, grazas á colaboración do alumnado de 3º A, celebramos unha mañá rosaliana ben especial sorprendendo, da man de Soraya e Elena, a rutina da vida académica nas aulas, nos corredores, na sala do profesorado, na cociña, nos departamentos, na conserxería... co agasallo de versos rosalianos.














E que mellor remate de festa dun día grande que descubrir unha outra forma de entender, escribir e  interpretar publicamente a poesía grazas aos versos e acordes das poetas Lucía Aldao e María Lado.

Moito nos prestou ... ou non? Que contades por aquí?

DESPEDIDA