Lagoa de Alcaián

Lagoa de Alcaián
Seavia - Coristanco

28 de ene. de 2015

DE DESCUBERTA POR COMPOSTELA

Esta xornada de mércores foi ben diferente ás habituais. 


Primeiro, iniciamos unha mañá ben teatreira onde rimos moito a conta dos prexuízos lingüísticos existentes na sociedade galega e que tan ben escenificaron os actores e a actriz da compañía ceense, Talía Teatro.

Nós, falamos sen 
             
              Pelos na lingua


E logo, no Museo da Historia Natural percorremos hábitas, ecosistemas e coleccións de minerais e rochas próximos e alleos, que moito nos sorprenderon pola súa riqueza e variedade.



Agardamos polas vosas impresións na sección de comentarios.

Quen se anima a comezar?

5 de ene. de 2015

CANTOS DE REIS

Imos botar ben alto algún cantar de Reis, non vaia ser que non acorden parar nas nosas casas.

Convosco... 

Os Cempés!


4 de ene. de 2015

FELIZ DÍA DE REIS


Na véspera do Día de Reis, deséxovos un día grande de sorpresas que chegan de quen máis vos quere.

E por se alguén quere saber o que pensan e falan os Reis Magos, podedes pasearvos polos múltiples relatos breves do seu gran libro. 

Con certeza, temos alguén ao redor a quen lle gustaría que o agasallásamos con palabras máxicas reais... ou non?


1 de ene. de 2015

A DAMA DA NOITE



A dama da noite, da autoría de Xavier Seoane e publicada por Edicións Laiovento, é a nosa lectura trimestral.

Unha novela sorprendente e arriscada xa que converte Rosalía de Castro nun personaxe de ficcción narrativa. 

Por iso a trama argumental cabalga sempre entre a imaxinación narrativa e a propia biografía da escritora fundacional da literatura galega no século XIX.

A web da Fundación Rosalía de Castro pode ser un bo camiño inicial para irmos descubrindo que realidade histórica se agocha nestas páxinas da man da súa protagonista.

19 de dic. de 2014

ACHEGÁNDONOS A ROSALÍA DE CASTRO

 

A Fundación Manuel María de Estudos Galegos convoca un concurso escolar de recitado de poesía de Rosalía.

 "Rosalía sempre viva"

Revisadas as bases deste concurso resulta ben apetecíbel intentalo, non si?

Rosalía agarda por nós en xaneiro á volta das vacacións de nadal.

Imos ensaiando por aquí algúns dos seus poemas?

 

15 de dic. de 2014

VALORACIÓNS SOBRE OS DATOS DO USO DO GALEGO POR IDADES



A interpretación obxectiva da gráfica da entrada anterior permitiunos confirmar que ao redor dun 25% das persoas comprendidas entre os 5 os 14 anos usan o galego sempre ou maioritariamente, mentres que case o 75% non o fan nunca ou case nunca.

Asemade, interpretamos que este feito imposibilita albiscar un futuro resistente e maioritario para o galego no seo da súa sociedade, pois cando se rompe a cadea da transmisión de lingua entre as xeracións (entre pais/nais e fillos/fillas) as dificultades para un idioma sobrevivir acrecéntanse perigosamente.

A análise exhaustiva dos datos deste inquérito do Instituto Galego de Estatística foi exposta en sucesivas entradas do xornal Praza, así que será este o primeiro punto informativo para esta tarefa.

Imos ler, despois, algunhas declaracións oficiais que pretenden xustificar estes datos por parte dos máximos responsábeis en materia de planificación lingüística, como son o Presidente da Xunta e mais o Conselleiro de Educación.

Tamén imos coñecer o parecer do escritor Xabier P. Docampo e deseguido cederemos a palabra a un alumno e unha alumna do IES Félix Muriel de Rianxo que tamén puxeron voz impresa ao seu pensamento reflexivo sobre esta cuestión.

Unha vez rematadas as lecturas atentas dos diferentes textos, chegará o momento de vos remangar e poñer mans á obra. Para facer que? Un texto expositivo-argumentativo en que, seguindo a estrutura propia deste modelo textual, expoñades a vosa impresión sobre a realidade lingüística que os datos deste inquérito están a fotografar.



NOVO DICIONARIO DE SINÓNIMOS



A Universidade de Vigo ofrecécenos unha nova ferramenta dixital para enriquecer a lingua galega desde calquera lugar.

Unha App lingüística coa que ampliaremos o noso campo lexicosemántico galego e á que lle daremos un posto destacado neste  blog de aula.


Benvida!

14 de dic. de 2014

NOVOS DATOS SOBRE O USO DO GALEGO

Estes días pasados coñecemos os datos do Instituto Galego de Estatística sobre o uso do galego segundo a idade recollidos na Enquisa de condicións de vida 2013.

O técnico de normalización lingüística do Concello de Carballo, Nel Vidal, recolleu os resultados do inquérito nesta gráfica que vós deberedes interpretar e comentar por escrito nas sesións do luns e martes desta última semana de trimestre escolar.



Deseguido iremos publicando en sucesivas entradas algunhas valoracións e opinións de diferentes persoas e colectivos que nesta semana pasada se foi facendo pública.


9 de dic. de 2014

MATRIARCAS

Neste día en que contabilizamos tres mulleres máis asasinadas por quen confunde o termo compañeiro, mozo ou marido, lembramos a homenaxe ás mulleres que a cantante Guadi Galego converte en protagonistas do seu novo traballo discográfico, Lúas de outubro e agosto.

Queremos as nosas Matriarcas canda nós, sempre!

Basta xa de terrorismo machista!


PESCUDANDO SOBRE MANUEL MARÍA




Iniciamos a nosa andaina investigadora ao redor da obra de Manuel María, o autor que dá nome á nosa biblioteca de secundaria.

Nesta primeira fase acompañounos a exposición de 30 paneis que nos foi introducindo nas ideas principais sobre a súa biobibliografía.



Tomando notas chegaremos ao vindeiro trimestre onde nos agardan varias sorpresas para completar o noso coñecemento deste escritor referencial ao longo da segunda metade do século XX.



E desde aquí compartillamos convosco as palabras do propio Manuel María nunha entrevista concedida hai uns anos ao programa "Amigos" na Galega.