Lagoa de Alcaián

Lagoa de Alcaián
Seavia - Coristanco

14/9/2014

BENVIDA AO CURSO 2014-2015




A quen se achega por este punto de encontro coa vertixe de toda primeira vez ou recunca un ano máis, aínda no mesmo curso por algún estraño despiste ou noutro superior, dámosvos a benvida!!!

En Lingua de Alcaián acharedes un complemento formativo ás aulas presenciais de lingua e literatura galega no Pichel.

En Lingua de Alcaián, como di a lenda do noso concello, non todo está na superficie, así que teremos que espilir os cinco sentidos para ir máis aló nas nosas preguntas. Precísanse compañeir@s de viaxe con capacidade de observación, curiosidade, inquietude, dúbidas e iniciativa propia. Serás ti un/unha delas?

Imos poñer a proba xa a vosa atención

QUE VES NESTA IMAXE?

Deixa a túa resposta inmediata na sección comentarios. As cinco primeiras persoas gañadoras levarán cadanseu premio!!!





19/5/2014

CORRELINGUA, UN PASO ADIANTE!!!

O pasado xoves 15 de maio o CORRELINGUA chegou á Coruña e nós fomos aló, á festa final, despois de ter participado nos diferentes concursos que se convocaron ao longo do ano.

Unha xornada festiva e reivindicativa que xa queda na nosa memoria persoal e fotográfica.




18/5/2014

EUROVISIÓN E LINGUAS MINORIZADAS


Velaquí o enlace ao artigo "Eurovisión, globalización e linguas minorizadas" do profesor da USC Francisco Fernández Rei.

Lembrade os contidos da tarefa que debedes realizar:

1. Resumo do contido do artigo
2. Comentario crítico

16/5/2014

17 DE MAIO DE 2014: XOSÉ Mª DÍAZ CASTRO



Mañá é o Día das Letras Galegas, unha data de recoñecemento do sistema literario galego que leva camiñando, paso a paso, desde a lírica medieval, nada máis e nada menos que oito séculos.

Mañá é o día perfecto para comezar coa lectura dun autor ben significativo da segunda metade do século XX: Xosé Mª Díaz Castro.

Imos achegarnos a el desde esta Lingua de Alcaián, grazas ao labor didáctico que comparten connosco desde diferentes propostas pedagóxicas escolares.


O poema "Penélope" é con certeza o máis recoñecido do autor pola súa simboloxía metafórica ao identificar a mítica Penélope con Galiza.

11/4/2014

YOLANDA CASTAÑO E A SEGUNDA LINGUA

A poeta Yolanda Castaño, que nos acompañou este curso nunha xornada inesquecíbel, acaba de recibir esta semana o XI Premio de Poesía Fundación Novacaixagalicia polo seu poemario A segunda lingua.


Velaquí o seu recén estreado booktrailer para comezarmos a tomarlle o gusto a esta nova proposta poética da autora.




6/4/2014

RESOLTOS OS CONCURSOS DO CORRELINGUA 2014


Xa se coñecen os centros gañadores dos concursos do CORRELINGUA 2014. 

O Manifesto premiado corresponde ao grupo "Os Ameneiros" do IES Isaac Díaz Pardo de Sada e o Vídeo gañador foi realizado polo alumnado do IES Elviña da Coruña.

Non fomos gañadores, mais foi unha boa experiencia ter participado! Grazas a todos os compañeiros e compañeiras de 3º e 4º que fixestes o posíbel por intentalo!



28/3/2014

COMO CHO DIGO;-)

Esta semana presentouse publicamente a campaña Como cho digo ;-) co obxectivo de reclamar a visibilizacion do galego nos medios de comunicación.

Este vídeo de presentación dá conta de diferentes reflexións ao redor da tradución ao castelán que moitas veces a prensa fai das declaracións ou entrevistas a persoas que se expresan en galego.

Seguro que recoñeceredes moitas caras!!!


Rematada a visualización, cómpre reflexionarmos sobre os contidos nel expresados, en primeiro lugar, para analizar deseguido a aplicación dos conceptos de "normalización" e "dinamización" lingüística, así como valorar cales dos tres pulos normalizadores (institucional, colectivo e individual) participan desta campaña.

14/3/2014

NOVA NARRATIVA GALEGA


Velaquí un enlace interactivo para completar as nosas explicacións e lecturas de aula ao redor da narrativa galega de posguerra.

Non esquezades que o vindeiro luns 17 de marzo deberedes ter decidido, aínda que é con carácter voluntario, o alumando de 4º ESO, que escritor ou escritora deste tempo ides analizar e presentar ao grupo.

Boa viaxe literaria!

9/3/2014

21 DÍAS CO GALEGO

 O Equipo de Dinamización da Lingua Galega do IES da Pobra do Caramiñal levou a cabo, por segundo ano consecutivo, durante vinte e un días do pasado mes de febreiro, unha actividade de normalización e dinamización lingüística coñecida como 21 Días co Galego.

Estes vinte e un vídeos de persoas representativas de sectores sociais, profesionais e de idade diferente, algúns recoñecidos publicamente e outros totalmente anónimos, dan para moito pensar, falar e escribir a respecto da realidade sociolingüística galega.

Imos aló, entón, poñer en práctica as nosas capacidades de observación e reflexión a partir destas ideas que cumprirá resolver para, no fin da actividade, entregar un traballo por escrito cuxa data se avanzará en breve.

1. A que sectores da sociedade vai dirixida esta proposta normalizadora? Por que?
2. Que argumentos se reflicten nos vídeos para convidar a usar o galego a diario?
3. Pensas que son argumentos convincentes? Por que?
4. Que prexuízos lingüísticos recoñeces nos diferentes vídeos?
5. Escolle os tres vídeos que máis te sorprendesen ou impactasen e elabora un comentario para cada un deles.

E máis nada... boa viaxe sociolingüística audiovisual!!!

18/2/2014

7º DÍA CON ROSALÍA


Rosalía Villar preséntanos a versión musical deste poema ben coñecido, "Campanas de Bastabales", interpretado por Amancio Prada e gravada o pasado mes de xaneiro no Pazo da Cultura de Pontevedra, na XI edición do festival Cantos na Maré.

Preguntarédesvos por que o escolleu. Velaí a resposta de Rosalía:
  Escollino porque me gustou. É un destes vídeos que escoitas e che gusta, pero descoňeces o motivo.